На магистралниот пат Кичево–Гостивар, кај месноста „Сеферов бунар“, вчера попладне се случила тешка сообраќајна незгода во која едно лице се здобило со тешки телесни повреди.
Според информациите од Министерството за внатрешни работи, несреќата се случила на 30 мај во 14:10 часот и во неа учествувале четири возила – товарно возило „Фолксваген Кеди“ со кичевски регистарски ознаки, управувано од 62-годишниот Ф.К. од селото Грешница, товарно возило „Сканија“ со албански регистарски ознаки, управувано од 60-годишниот А.С. од Делисуфај, Албанија, патнички автомобил „БМВ“ со унгарски национални ознаки, управуван од 45-годишна жена од Будимпешта, како и патнички автомобил „Фиат“ со српски национални ознаки, управуван од 32-годишна жена од Ниш.
Во незгодата со тешки телесни повреди се здобил возачот на „Фолксваген Кеди“, кој поради сериозноста на повредите бил пренесен во Ургентниот центар „Мајка Тереза“ во Скопје.
Увид на местото на настанот извршиле полициски екипи, а причините за несреќата се утврдуваат.
