ТикТок предизвик заврши трагично: Двајца тинејџери загинаа откако возеле со изгасени фарови

Двајца тинејџери загинаа во тешка сообраќајна несреќа во романскиот округ Прахова, откако автомобилот во кој се возеле излетал од патот и удрил во дрво. Според романските медиуми, несреќата се случила додека младите се обидувале да го повторат предизвикот што го виделе на „ТикТок“.

— реклама —

Осумнаесетгодишниот Андреј, кој управувал со автомобилот, и 19-годишниот Михај, кој седел на совозачкото место, биле во возилото заедно со уште еден млад човек.

Преживеаниот патник раскажал дека за време на ноќното возење биле изгасени фаровите на автомобилот. Според неговото сведочење, фаровите биле исклучени околу две секунди, а потоа возачот повторно ги вклучил и забрзал токму пред кривината.

— реклама —

Во свиокот, возачот ја загубил контролата врз возилото, кое излетало од патот и со голема сила удрило во дрво. Михај починал на местото на несреќата, додека Андреј бил пренесен во болница, но и тој подоцна им подлегнал на повредите.

— реклама —

Преживеаниот млад човек, кој седел на задното седиште, успеал да излезе од возилото и да побара помош. Според неговата мајка, првите две возила што наишле не застанале, а помош била повикана откако застанал трет автомобил.

Сведоци тврдат дека автомобилот се движел со голема брзина, а еден од нив навел дека возачот возел и до 120 километри на час. Жителите на областа велат дека на оваа делница често се вози брзо и ја сметаат за опасна.

Романската полиција отворила истрага за сообраќајната несреќа со смртни последици, која треба да ги утврди сите околности и причините што довеле до трагедијата.