Шпанија во текот на јуни регистрирала 1.029 смртни случаи кои се поврзуваат со екстремно високите температури, покажуваат најновите податоци од системот за следење на смртноста при шпанското Министерство за здравство.
Земјата минатиот месец беше погодена од петдневен топлотен бран, а според Државната метеоролошка агенција (AEMET), просечната температура во јуни била за 3,2 степени Целзиусови повисока од вообичаената. Тоа го прави вториот најтопол јуни откако се води евиденција, веднаш зад јуни 2025 година.
Најкритичен бил 23 јуни, кога околу 35,7 милиони луѓе, односно 73 проценти од населението на Шпанија, биле изложени на здравствени ризици поради високите температури. Од нив, 38 проценти се соочиле со висок степен на опасност.
Податоците покажуваат дека од 1975 година досега во Шпанија биле регистрирани 12 топлотни бранови во текот на јуни, а дури половина од нив се случиле во последната деценија. Исто така, сите 13 најтопли месеци јуни од почетокот на мерењата во 1961 година се забележани во 21 век.
Портпаролот на AEMET, Рубен дел Кампо, изјави дека ова е доказ дека топлотните бранови почнуваат сè порано во текот на летото и стануваат сè почести.
Во периодот од 1 до 30 јуни, на мерните станици низ Шпанија биле соборени 165 рекорди за највисока измерена температура. Од метеоролошката служба наведуваат дека првиот топлотен бран ова лето бил особено силен во северните делови на земјата, не само поради интензитетот, туку и поради неговото траење и упорност.
