Тошковски: Целта не е само заплена на дрога, туку откривање на криминалните структури и парите зад трговијата

Министерот за внатрешни работи Панче Тошковски денеска во Полициската академија во Скопје присуствуваше на отворањето на обука за истраги и кривично гонење на кривични дела поврзани со дроги, организирана од Канцеларијата на Обединетите нации за дрога и криминал (UNODC), со поддршка на Амбасадата на САД.

Обуката е дел од проектот за поддршка на спроведувањето на Националната стратегија за дроги, а нејзината цел е унапредување на капацитетите за спроведување сложени истраги преку поврзување на криминалистичките и финансиските истраги, одземање имот и примена на посебни истражни техники.

— реклама —

На настанот присуствуваа и Каролајн Р. Боденхеген, директорка во Бирото за меѓународни прашања поврзани со наркотици и спроведување на законот (INL), како и Данило Рици, регионален претставник на UNODC за Југоисточна Европа.

Тошковски истакна дека борбата против трговијата со дрога е еден од приоритетите на Министерството за внатрешни работи, посочувајќи ги досегашните акции и заплени на различни видови дрога.

— реклама —

„Годината ја започнавме со откривање на над 10 килограми кокаин, за да продолжиме со една од најголемите операции каде беа одземени над 40 тони марихуана и канабис-биомаса, а во одделни акции беа запленети дополнително 150 и 65 килограми марихуана, па сè до последната акција минатата недела кога откривме 680 килограми стебла канабис. Дополнително реализирани се повеќе случаи поврзани со хероин, синтетички дроги, вклучително амфетамин, метамфетамин и МДМА“, рече Тошковски.

Според него, следниот чекор е истрагите да се насочат не само кон откривање и заплена на дрогата, туку и кон лицата, криминалните структури и финансиските текови што стојат зад нелегалната трговија.

„Нашата цел е овие активности да продолжат со уште поголема ефикасност и да бидат насочени не само кон заплената на дрогата, туку и кон откривање на лицата, структурите и финансиските текови што стојат зад нејзината трговија. Тоа бара силна меѓународна соработка, навремена размена на информации и заедничко дејствување“, потенцираше министерот.

— реклама —

Тошковски изрази благодарност до САД за поддршката во јакнењето на институционалните и оперативните капацитети на Министерството, како и до UNODC за реализацијата на проектот и соработката во борбата против организираниот криминал.

На полициските службеници и истражителите кои учествуваат на обуката им порача дека имаат целосна институционална поддршка во спроведувањето на сложените истраги поврзани со трговијата со дрога.

„Министерството за внатрешни работи, како и јас лично, стоиме целосно зад активностите насочени кон зајакнување на соработката и одлучно справување со трговијата со дрога и организираниот криминал“, порача Тошковски.

Обуката е дел од активностите за продлабочување на соработката меѓу Министерството за внатрешни работи, UNODC и меѓународните партнери, со фокус на практични знаења и современи истражни методи за поефикасно откривање и кривично гонење на криминалните структури поврзани со недозволената трговија со дрога.