Тошковски: Само со заедничко дејствување можеме да создадеме побезбедна средина за младите

Министерот за внатрешни работи Панче Тошковски денеска учествуваше на настан на високо ниво посветен на превенцијата на насилството кај младите, како и на церемонијата на потпишување на Декларацијата за намери за превенција од насилство кај младите, организирани со поддршка на Мисијата на ОБСЕ во Скопје.

На настанот присуствуваа претставници на Владата, меѓународната заедница, институции, младински и граѓански организации, при што беше истакната потребата од заеднички и координиран пристап во спречувањето на сите облици на насилство кај младите, вклучително и насилството во дигиталниот простор.

— реклама —

Во своето обраќање, Тошковски нагласи дека превенцијата на насилството кај младите не претставува еднократна активност, туку континуиран процес што бара секојдневна посветеност и тесна координација меѓу сите релевантни чинители.

— реклама —

„Декларацијата за намери што денес ја потпишуваме поставува заедничка рамка за дејствување врз принципите на еднаквост, недискриминација, инклузивност, пристапност и активно учество на младите. Само преку силна меѓуинституционална соработка и навремена реакција можеме да создадеме побезбедна средина за младите – во училиштето, во заедницата и онлајн“, истакна Тошковски.

Тој посочи дека Министерството за внатрешни работи веќе спроведува повеќе активности насочени кон спречување на насилството кај младите, меѓу кои воспоставување контакт-полициски службеници во и околу училиштата, редовни средби со ученичките совети, едукативни активности за врсничко и онлајн насилство, како и работилници за сајбер-малтретирање и безбедно користење на интернет.

— реклама —

Министерот додаде дека МВР го зајакнува присуството на полицијата во заедницата, особено во близина на училиштата и спортските објекти, како и соработката со спортските клубови со цел навремено препознавање и пријавување на насилство, дискриминација и говор на омраза.

— реклама —

На средбата беше нагласена и потребата од дополнително унапредување на координацијата меѓу образовните институции, полицијата, локалната самоуправа, здравствените и социјалните служби, со цел да се обезбеди побрз и поефикасен одговор на сите појави на насилство кај младите.

Со потпишувањето на Декларацијата за намери, институциите и партнерските организации ја потврдија својата заложба за создавање побезбедна, поинклузивна и поддржувачка средина за младите, ослободена од насилство и страв.