Министерот за внатрешни работи Панче Тошковски на прес конференција изјави дека случајот со врсничко насилство во скопската општина Ѓорче Петров е во фаза на истрага, која се спроведува во координација со Јавното обвинителство.
Тој посочи дека во рамки на постапката досега на разговор се повикани 14 лица, а за дел од нив ќе следуваат соодветни процесни дејствија. Поради тоа што станува збор за малолетници, истрагата се води со посебна внимателност и со ограничено споделување информации во јавноста.
Тошковски нагласи дека врсничкото насилство е сериозен општествен проблем и дека Министерството активно работи и на превентивен и на репресивен план.
„Станува збор за проблем на кој му пристапуваме сериозно, особено во образовните институции. Потребен е мултисекторски пристап и вклученост на сите надлежни институции,“ истакна министерот.
Тој додаде дека значајна улога во справувањето со овој проблем имаат и родителите, како и образовниот систем, нагласувајќи дека е потребна заедничка акција за спречување на вакви појави.
„Мора да има заеднички институционален одговор, но и поголема улога на родителите во воспитувањето и насочувањето на децата,“ рече Тошковски.
Министерот апелираше јавноста да биде свесна дека врсничкото насилство не е изолиран случај и дека е потребен системски пристап за негово долгорочно спречување.
