На скијалиштето Мелхзе-Фрут во Швајцарија вчера се случи трагична несреќа во која животот го загуби 41-годишен маж. Несреќата се случила околу 9:05 часот на скијачката патека Ерзег, додека тој бил со својот шестгодишен син.
До трагедијата дошло кога 29-годишен сноубордер, прелетувајќи преку едно возвишение, налетал на нив. Ударот бил толку силен што 41-годишникот добил тешки повреди на главата и починал на лице место. Синот и сноубордерот се здобиле со полесни повреди и по укажаната прва помош биле префрлени во блиската болница.
Кантоналната полиција на Обвалден, во соработка со Државното обвинителство, започнала кривична постапка против сноубордерот и спроведува истрага за околностите на несреќата.
