Американскиот претседател Доналд Трамп ги ублажи претходните изјави во врска со можноста САД да го преземат иранскиот остров Харг, наведувајќи дека иако тоа би била негова лична преференција, не е сигурен дали постои поддршка за таков потег во самата Америка.
Во интервју за „Фокс њуз“, Трамп изјави дека би сакал САД да го заземат Харг, кој има стратешко значење за иранскиот нафтен извоз, но додаде дека не знае дали американската јавност и институциите имаат „апетит“ за таква акција.
Тој посочи дека Вашингтон и натаму води разговори со Техеран за можен договор, оценувајќи дека Иранците се „горд народ“.
„Попрво не би ги гаѓал“ мостовите и електраните во Иран, рече Трамп, додавајќи дека не сака иранските граѓани да останат без пристап до питка вода.
Изјавите претставуваат поумерена реторика во однос на неговите претходни пораки, во кои најавуваше преземање контрола врз иранската нафтена инфраструктура. Сепак, тие доаѓаат во период на зголемени тензии и продолжени преговори меѓу Вашингтон и Техеран околу можноста за прекин на конфликтот.
