Американскиот претседател Доналд Трамп изјави дека Иран бил „до одреден степен испровоциран“ да го изврши нападот врз Кувајт, кој следувал по американските воздушни удари врз иранска територија.
Говорејќи пред новинарите во Овалната соба, Трамп оцени дека нападот бил реакција на претходните американски воени дејствија.
„Може да се каже дека беа донекаде испровоцирани, бидејќи ние презедовме силна акција од други причини, а тие потоа возвратија“, изјави Трамп.
На прашањето дали прекинот на огнот со Иран сè уште е на сила по нападите врз Кувајт, американскиот претседател посочи дека ситуацијата треба да се разгледува во поширок контекст.
„Ние ги погодивме доста силно претходната ноќ, а и ноќта пред тоа. За некои работи постои причина“, рече Трамп.
Во текот на неделава САД и Иран разменија удари во една од најсериозните ескалации откако во април беше воспоставен прекин на огнот. Иранските напади врз Кувајт и Бахреин уследија по американските операции на иранска територија.
Техеран, пак, ги обвинува земјите од Персискиот Залив дека им дозволуваат на американските сили да го користат нивниот простор и инфраструктура за изведување напади врз Иран.
