Американскиот претседател Доналд Трамп денеска изјави дека Иран се согласил на „нуклеарни инспекции од највисоко ниво во иднина“, оценувајќи дека е постигнат значителен напредок во преговорите меѓу двете земји.
Во објава на социјалната мрежа „Трут соушл“, Трамп наведе дека договорот ќе обезбеди „нуклеарна искреност“ и дека иранските власти направиле „големи отстапки“.
Тој истакна дека, врз основа на тоа, било одлучено Ормускиот теснец да остане отворен, додавајќи дека американските сили ќе ја задржат можноста повторно да воведат блокада доколку тоа биде потребно.
Американскиот претседател посочи и дека средствата што евентуално ќе бидат ослободени од американското Министерство за финансии ќе бидат префрлени на посебна банкарска сметка под контрола на САД и ќе можат да се користат исклучиво за набавка на храна и медицински производи за Иран.
„Разговорите напредуваат добро“, напиша Трамп, додавајќи дека низ Ормускиот теснец вчера поминале 19 милиони барели нафта, што според него претставува рекорд.
„Цените на нафтата паѓаат, а светот е многу побезбедно место“, наведе американскиот претседател.
Во меѓувреме, портпаролот на иранското Министерство за надворешни работи, Есмаил Багаеи, ги демантираше информациите за каква било средба со генералниот директор на Меѓународната агенција за атомска енергија, Рафаел Гроси, како и тврдењата дека е постигнат договор за инспекција на иранските нуклеарни постројки погодени во неодамнешните напади.
Со тоа, останува нејасно дали меѓу двете страни навистина е постигнат конечен договор за инспекциите.
