Соединетите Американски Држави истражуваат дали Иран складира беспилотни летала на Куба, а можно е и ракети, потврди американскиот претседател Доналд Трамп.
Одговарајќи на новинарско прашање во Овалната соба, Трамп изјави дека неговата администрација ги проверува информациите и порача дека Вашингтон ќе реагира доколку тие се покажат како точни.
„Ако ги имаат, а сосема е можно да ги имаат, ќе се погрижиме за тоа“, рече Трамп.
Тој не презентираше фотографии, разузнавачки документи или други докази што би ги потврдиле тврдењата, ниту откри детали за бројот, видот или локацијата на наводното оружје. Прашањето било поставено врз основа на необјавен разузнавачки извештај.
Трамп додаде дека државниот секретар Марко Рубио веќе е запознаен со случајот, посочувајќи дека Стејт департментот работи на ова прашање. Засега е потврдено само дека е отворена истрага, но не и дека на Куба навистина се наоѓа иранско оружје или дека постои непосредна закана. Кубанските власти сè уште не ги коментирале овие наводи.
Изјавите на Трамп доаѓаат во период на засилен притисок врз Хавана. Американскиот Стејт департмент неодамна воведе нови санкции против повеќе компании поврзани со кубанската влада, а претходно санкции беа воведени и против кубанскиот претседател Мигел Дијаз-Канел и други високи функционери.
Во меѓувреме, порталот „Аксиос“ објави анализа во која се наведува дека Куба од 2023 година набавила повеќе од 300 воени беспилотни летала од руско и иранско потекло. Според анализата, кубанските вооружени сили ја разгледуваат можната употреба на овие системи против американски цели, но за овие тврдења засега нема официјална потврда.
