Трамп избегна директно да го поддржи Нетанјаху пред изборите во Израел

Американскиот претседател Доналд Трамп избегна директно да му даде поддршка на израелскиот премиер Бенјамин Нетанјаху за нов мандат пред изборите во Израел, закажани за 27 октомври.

— реклама —

Во интервју за магазинот „Тајм“, Трамп бил прашан дали Нетанјаху треба повторно да биде премиер. Тој не дал директен одговор, туку рекол дека повеќе не се занимава со политика и дека негов приоритет е помошта во одбраната на Израел.

Трамп во интервјуто зборувал и за својот углед во Израел, тврдејќи дека неговата популарност во земјата достигнува околу 99 отсто поради потезите што ги презел за време на својот мандат.

— реклама —

На прашањето дали Вашингтон би можел поефикасно да соработува со опозицискиот кандидат и поранешен началник на Генералштабот, Гади Ајзенкот, Трамп рекол дека за него „не слушнал ништо лошо“.

— реклама —

Сепак, американскиот претседател предупредил дека Нетанјаху не треба предвреме да биде отпишан.

„Луѓето го отпишаа Биби многу, многу пати, исто како што многу пати ме отпишаа и мене“, рекол Трамп, додавајќи: „Јас не би го потценувал Биби“.

— реклама —

Според наводите во текстот, односите меѓу Трамп и Нетанјаху во последните месеци станале понапнати. Како причини се наведуваат војната во Иран, како и продолжувањето на израелските воени операции во Либан и Газа.