Трамп најави нови напади врз Иран доколку повторно бидат нападнати бродови во Ормускиот Теснец

Американскиот претседател Доналд Трамп повторно упати остро предупредување до Иран, најавувајќи дека САД ќе извршат нови напади врз иранската инфраструктура доколку Техеран повторно напаѓа бродови во Ормускиот Теснец.

Во објава на социјалната мрежа Truth Social, Трамп порача дека секој иден напад врз пловни објекти во теснецот ќе биде проследен со американски воздушен удар врз цивилна инфраструктура во Иран.

— реклама —

„Од овој момент, секој пат кога Исламската Република Иран ќе пука врз брод во Ормускиот Теснец, без разлика дали со ракета, дрон или какво било друго оружје, САД ќе бомбардираат и ќе уништат еден мост или една електрана, вклучувајќи ги и оние што се наоѓаат во близина на главниот град Техеран или во самиот Техеран“, напиша Трамп.

— реклама —

Неговата изјава следува по серијата ирански напади врз американски бази во Заливот. Во меѓувреме, дел од експертите за меѓународно право и неколку светски лидери ги осудија ваквите закани, оценувајќи дека нападите врз цивилна инфраструктура би биле спротивни на меѓународното право.

Трамп, исто така, изјави дека американските воени операции против Иран ќе продолжат.

— реклама —

„Тие ќе платат висока цена, тие се десеткувани“, им рече тој на новинарите.

На прашањето дали американската јавност ја поддржува воената кампања против Иран, Трамп одговори дека Американците не се против војната и тврдеше дека тоа го покажуваат и најновите анкети.

„Американците не сакаат високи цени на бензинот, но не се против војната. Нова анкета штотуку го покажа тоа многу јасно“, изјави Трамп, без да наведе на кое истражување се повикува.