Американскиот претседател Доналд Трамп најави голем договор за набавка на ѓубрива од Белорусија, и покрај блиските односи на Минск со Москва и поддршката за руската агресија врз Украина.
Трамп на социјалните мрежи објави дека калиумовата сол од Белорусија ќе биде „значително поевтина“ од онаа што САД моментално ја набавуваат од Канада.
Калиумовата сол е минерал богат со калиум и главно се користи за производство на ѓубрива, бидејќи го поттикнува растот на земјоделските култури и придонесува за поголеми приноси. Канадските производители во моментов покриваат најголем дел од потребите на американските земјоделци.
Белорусија е меѓу најголемите производители на калиумова сол во светот. Сепак, Европската Унија го забранува нејзиниот увоз од Белорусија и има замрзнато имот на државната компанија „Беларускали“.
Најавата на Трамп е последна во низата чекори кон подобрување на односите меѓу Вашингтон и Минск. Преговорите што ги водеше американскиот претставник Џон Коул резултираа со тоа белорускиот претседател Александар Лукашенко да помилува стотици политички затвореници.
САД, од своја страна, ги ублажија санкциите кон белоруски компании, вклучително и кон компании од индустријата за производство на ѓубрива.
Белорусија и понатаму останува близок сојузник на Русија. Минск ѝ овозможи на Москва во 2022 година да ја користи белоруската територија како појдовна точка за инвазијата врз Украина, а неодамна одобри и заеднички нуклеарни вежби.
