Американскиот претседател Доналд Трамп објави дека САД ќе воведат надоместок од 20 проценти за товарот што се превезува низ Ормускиот теснец, како компензација за обезбедувањето на пловидбата низ овој стратешки важен поморски премин.
Во објава на социјалната мрежа „Трут соушал“, Трамп истакна дека Ормускиот теснец ќе остане отворен „со или без Иран“ и најави повторно воведување на, како што ја нарече, „иранската блокада“.
Според него, мерката ќе се однесува само на иранските бродови и на пловилата што соработуваат со Иран, додека останатите држави ќе можат непречено да го користат теснецот.
„Соединетите Американски Држави отсега ќе бидат познати како ‘чувар на Ормускиот теснец’. Од правичност, ќе ни бидат надоместени сите трошоци за обезбедување безбедност во овој многу нестабилен дел од светот, со стапка од 20 проценти на целиот товар што се превезува“, напиша Трамп.
Тој не објасни врз која основа би се пресметувал надоместокот, кој точно би го плаќал и на кој начин би се спроведувала наплатата.
Претходно, во интервју за „Фокс њуз“, Трамп изјави дека САД најверојатно ќе ја преземат контролата врз Ормускиот теснец и дека другите држави ќе треба да плаќаат „многу пари“ за неговата заштита.
Неговите изјави доаѓаат во време на нова ескалација на судирите меѓу САД и Иран. Американската Централна команда (CENTCOM) соопшти дека извршила напад врз објект за одржување на подморници и бродови во иранската поморска база Бандар Абас, при што за првпат во борбена операција биле употребени беспилотни површински пловила.
Од друга страна, Иран во текот на викендот и денеска изврши ракетни и беспилотни напади врз американски воени објекти во повеќе земји од Персискиот залив. Во саботата Техеран повторно објави дека го затвора Ормускиот теснец, наведувајќи дека пловидбата ќе остане запрена сè додека не се воспостават „стабилност и мир“.
САД, пак, тврдат дека Иран нема право да го контролира теснецот и дека американските сили се распоредени за да обезбедат слободна и безбедна пловидба.
