Американскиот претседател Доналд Трамп на социјалната мрежа Truth Social повторно објави фотографија генерирана со вештачка интелигенција, на која е прикажан како го прегрнува Исус, со американско знаме во позадина.
Во објавата, Трамп напиша дека „радикалните левичари можеби нема да го сакаат ова“, но дека нему му изгледа „прилично убаво“. Сликата, која брзо се прошири на социјалните мрежи, прикажува како Исус стои зад него и го прегрнува додека тој е на говорница.
Станува збор за содржина преземена од профил кој го поддржува Трамп, каде што покрај фотографијата беше споделен и текст со религиозни и контроверзни пораки.
Ова не е првпат Трамп да објави ваква содржина. Само неколку дена претходно, тој сподели друга АИ-слика на која беше прикажан како Исус, што предизвика бурни реакции, вклучително и критики од верски групи и конзервативни коментатори кои ја оценија како богохулна.
По бранот реакции, претседателот ја избриша таа објава и изјави дека мислел оти е прикажан како лекар, а не како Исус, префрлајќи ја вината за контроверзите на медиумите.
Интересно е што критики за ваквите објави не дојдоа само од политичките противници, туку и од дел од неговите поддржувачи, кои оценија дека ваквите содржини се невкусни и навредливи за верниците.
