Трамп под притисок: Војната со Иран ги удира американските џебови

Американскиот претседател Доналд Трамп се соочува со сериозен политички и економски предизвик, откако војната со Иран почна директно да влијае врз животниот стандард на граѓаните, токму спротивно од неговите изборни ветувања за пониски трошоци за живот.

Ескалацијата на конфликтот на Блискиот Исток доведе до нагло зголемување на цените на нафтата, кои повторно ја надминаа границата од 100 долари за барел. Како последица, цените на горивата во САД бележат силен раст, при што бензинот достигна просек од 3,79 долари по галон, што е зголемување од речиси еден долар за само еден месец.

— реклама —

Дизелот, кој е клучен за транспортот и индустријата, поскапе уште повеќе, што дополнително ги зголемува цените на производите и услугите. Паралелно, поскапува и авионското гориво, што се очекува да се прелее врз цените на авионските билети и туристичката индустрија.

Клучен фактор во целата ситуација е и блокадата на Ормускиот теснец, преку кој минува околу една петтина од светската нафта. Намалениот транспорт и нападите врз енергетската инфраструктура создадоа сериозни нарушувања на глобалниот пазар.

— реклама —

Ова ја става Федералната резерва во незавидна позиција. Иако Трамп бара намалување на каматните стапки за да се олесни задолжувањето и да се поттикне економијата, растечката инфлација, поттикната од скапите енергенси, го отежнува таквиот потег.

Високите камати веќе ги зголемуваат ратите за станбени кредити, автомобилски заеми и кредитни картички, што дополнително ги оптоварува американските домаќинства.

— реклама —

Трамп отворено влезе во конфликт со првиот човек на Федералните резерви, Џером Пауел, барајќи итно намалување на каматите. Но, од централната банка порачуваат дека нема да преземат таков чекор без јасни сигнали за намалување на инфлацијата.

Во меѓувреме, претседателот се обидува да ја минимизира загриженоста, оценувајќи дека економските потреси се „мала цена за националната безбедност“ и уверувајќи дека цените на енергенсите ќе паднат по завршувањето на конфликтот.

— реклама —

Сепак, реалноста на терен е поинаква – војната веќе ги покачува трошоците за живот, ја комплицира економската политика и го става Трамп во една од најтешките ситуации во неговиот мандат.