Американскиот претседател Доналд Трамп им се придружи на светските лидери на Самитот на Г7 во францускиот град Евијан-ле-Бен, каде што олеснувањето поради договорот за ставање крај на војната со Иран беше засенето од новите американски закани за воведување царини кон Франција.
Трамп изјави дека „сè е многу убаво“ по пристигнувањето на самитот, само неколку часа откако беше постигнат прелиминарен договор со Иран. Прашањето за Блискиот Исток ќе биде една од главните теми на средбата на лидерите на најразвиените земји.
Пред заминувањето за Франција, американскиот претседател предупреди дека ќе воведе царини од 100 отсто за француското вино доколку Париз не го укине дигиталниот данок за американските технолошки компании. Во меѓувреме, францускиот претседател Емануел Макрон порача дека Франција нема да попушти под ваквите притисоци.
„Царините никому не му носат добро, особено не меѓу земјите од Г7“, изјави Макрон.
Покрај ситуацијата на Блискиот Исток, лидерите на Г7 ќе разговараат и за војната во Украина, глобалните економски нерамнотежи и намалувањето на зависноста од кинеските критични минерали.
Во фокусот останува и договорот меѓу САД и Иран, кој треба формално да биде потпишан во петок во Швајцарија. Трамп најави дека Ормускиот Теснец целосно ќе биде отворен во петок, додека деталите од меморандумот и натаму ќе бидат предмет на дополнителни технички преговори.
За време на самитот, Трамп треба да се сретне и со украинскиот претседател Володимир Зеленски, во период кога Киев повторно бара поголема воена и финансиска поддршка од западните сојузници.
