Американскиот претседател Доналд Трамп продолжи со јавните критики кон италијанската премиерка Џорџа Мелони, тврдејќи дека таа постојано барала да се фотографира со него за време на неодамнешниот самит на Г7.
Во објава на својата социјална мрежа Truth Social, Трамп наведе дека Мелони наводно инсистирала на заеднички фотографии и ја поврза таа ситуација со, како што тврди, нејзиниот пад на популарноста во Италија.
„За време на самитот на Г7 во Франција, Џорџа Мелони постојано бараше да се фотографира со мене“, напиша Трамп. Тој додаде дека италијанската премиерка, според него, ја намалила поддршката во јавноста бидејќи се дистанцирала од Соединетите Американски Држави во прашања поврзани со Иран.
Трамп понатаму оцени дека по американските акции против Иран, Мелони повторно сакала да воспостави поблиски односи со него за да ја подобри својата политичка позиција.
Италијанската премиерка брзо реагираше на ваквите обвинувања преку социјалните мрежи, оценувајќи ги како „бесмислени и неиспровоцирани напади“.
„Овие постојани, неиспровоцирани напади се бесмислени. Што се однесува до мојата популарност, пријателството со вас сигурно не ми помогна, ниту пак зависи од мојот однос со вас“, порача Мелони.
Јавната расправија започна по завршувањето на самитот на Г7, кога Трамп во разговор со италијански новинар изјави дека му било жал за Мелони затоа што, според него, барала заедничка фотографија. Италијанската премиерка уште тогаш ги отфрли ваквите тврдења, нагласувајќи дека тие се целосно измислени и дека „ниту таа ниту Италија не молат никого за ништо“.
Односите меѓу двајцата лидери, кои порано важеа за блиски сојузници, во последните месеци се влошија. Несогласувањата дополнително се продлабочија откако Рим одби да ги поддржи американските операции во Иран, а Мелони застана во одбрана на папата Лав XIV по критиките што ги упати администрацијата на Трамп поради неговите ставови за војната и американската имиграциска политика.
