Тензиите меѓу САД и Иран дополнително ескалираат откако американскиот претседател Доналд Трамп упати нови закани за напади врз клучна инфраструктура, на што Техеран возврати со најави за проширување на метите во регионот.
Иран предупреди дека ќе таргетира енергетска инфраструктура и телекомуникациски компании поврзани со американски капитал доколку продолжат заканите од Вашингтон.
Гласноговорникот на иранската војска, Ебрахим Золфагари, изјави дека Техеран ќе одговори на секој ваков потег и дека потенцијални цели би можеле да бидат клучни сектори во земји од Блискиот Исток каде оперираат компании со американски акционери.
Овие закани доаѓаат откако Трамп на својата социјална мрежа порача дека американската војска „сè уште не започнала“ со уништување на клучната инфраструктура во Иран.
„Нашата војска, најголемата и најмоќна било каде во светот, сè уште не започнала да го уништува она што остана во Иран. Следни се мостови, потоа електрани“, напиша Трамп.
Станува збор за една од најострите јавни изјави досега, во која директно се споменуваат напади врз цивилна инфраструктура.
Во меѓувреме, повеќе од 100 експерти за меѓународно право во САД предупредија дека ваквите потези би можеле да претставуваат кршење на меѓународното хуманитарно право и потенцијални воени злосторства.
Во писмото, потпишано од професори од водечки универзитети, се изразува „сериозна загриженост“ поради нападите врз цивилни објекти, вклучително и училишта и здравствени установи.
Војната меѓу САД, Израел и Иран влегува во петтата недела, со зголемен ризик од поширока регионална ескалација и дополнителни последици врз глобалната економија.
