За време на свечениот прием на кралот Чарлс и кралицата Камила во Вашингтон, американскиот претседател Доналд Трамп привлече внимание со низа необични коментари – од шеги на сметка на британскиот монарх до забелешки за сопствената сопруга Меланија.
Државната посета на британскиот кралски пар започна со официјална церемонија на јужниот тревник на Белата куќа. Во својот говор, Трамп од темата за 250 години пријателство меѓу САД и Обединетото Кралство премина на лични анегдоти.
Се присети на својата мајка Мери Ен Меклауд и нејзиното воодушевување од покојната кралица Елизабета Втора.
Анегдота за мајката и кралот
Во малку бизарен момент, Доналд Трамп се пошегува дека неговата мајка била „заљубена“ во кралот Чарлс Трети додека бил млад принц, што предизвика малку непријатна насмевка кај британскиот монарх, пишува The Independent.
Трамп раскажа дека неговата мајка, гледајќи го младиот Чарлс на телевизија, често велела дека е „симпатичен“.
„Секогаш кога кралицата ќе беше дел од некоја церемонија или нешто слично, мајка ми беше залепена за телевизорот и велеше: ‘Погледни, Доналде, колку е тоа убаво’“, рече Трамп.
„Таа навистина ја сакаше таа фамилија, но се сеќавам и дека јасно рече: ‘Погледни го младиот Чарлс, толку е симпатичен.’ Мајка ми беше заљубена во Чарлс. Можете ли да верувате? Се прашувам што би мислела сега“, истакна тој.
На оваа забелешка, кралот Чарлс реагираше со смеа и малку засрамено мафтање со раката.
Мајката на Трамп, Мери Ен, е родена во 1912 година во Шкотска. Во Америка емигрирала во 1930 година, а во 1942 година станала државјанка.
Во Њујорк го запознала претприемачот Фред Трамп, со кој била во брак 63 години и имале пет деца. Починала во август 2000 година на 88-годишна возраст.
„Нема да го достигнеме тој рекорд, драга“
По тоа што го спомена долгиот брак на своите родители, Трамп се сврте кон првата дама Меланија, која седеше зад него заедно со кралицата Камила.
„Тоа е рекорд што нема да можеме да го достигнеме, драга. Жал ми е, едноставно нема да оди така. Ќе ни биде добро, но не толку добро“, рече тој.
Со оваа шега Трамп алудираше на разликата од 24 години меѓу него и неговата 56-годишна сопруга. Парот се запознал во 1998 година, кога таа имала 28, а тој 52 години.
Судирот со Џими Кимел ескалира
Опуштената шега на Трамп за возраста на сопругата дојде еден ден по неговото барање ABC „веднаш да го отпушти“ Џими Кимел, долгогодишен водител на вечерно шоу, по шега кажана во емисија.
Кимел ја опишал првата дама како личност со „сјај на вдовица“, што било протолкувано како алузија на годините на претседателот.
По обид за вооружен напад на добротворна вечера, претседателот и првата дама ги осудија коментарите на Кимел како поттикнување на атентат. Меланија Трамп на мрежата X го обвини Кимел за користење „говор на омраза и насилство“, нарекувајќи го „кукавица“.
Трамп на својата платформа Truth Social отиде чекор понатаму, обвинувајќи го Кимел дека повикува на негова смрт.
„Џими Кимел треба веднаш да биде отпуштен од Дизни и ABC. Ви благодарам за вниманието!“, порача тој.
И покрај барањето на Трамп, ABC ја емитуваше емисијата на Кимел според планот.
