САД подготвуваат нов пакет економски мерки против Иран, кои американскиот претседател Доналд Трамп ги опишува како досега невиден притисок врз иранската економија. Целта, според неговите изјави, е Техеран да биде принуден да попушти по речиси шест месеци војна.
Трамп во интервју за „Фокс њуз“ изјави дека Вашингтон планира силен удар врз иранската економија, додека преговорите меѓу двете земји за траен мир остануваат во застој.
Во меѓувреме, повремените судири продолжуваат да го нарушуваат протокот на нафта и други стратешки суровини низ Ормускиот Теснец. Иран и САД меѓусебно се обвинуваат за недоверливост во преговорите, а Техеран презеде мерки за задржување на контролата врз пловниот пат.
Трамп во петокот ја пофали американската блокада на иранските пристаништа, нарекувајќи ја „челичен ѕид“ што му овозможува на Вашингтон вистинска контрола врз пловниот пат. Иран, пак, тврди дека и натаму сам управува со сообраќајот низ теснецот.
Американскиот министер за финансии Скот Бесент најави дека дополнителните економски мерки против Иран ќе бидат објавени следната недела. Тој ги опиша како нешто „што никогаш претходно не сме го виделе во историјата на економската изолација на една држава“, но не откри детали.
Иранската економија веќе е под силен притисок. Голем дел од индустриските капацитети се оштетени, а извозот на сурова нафта е сериозно ограничен поради американската блокада. Сепак, досегашните санкции не го натераа Техеран да се откаже од нуклеарната програма или од контролата врз Ормускиот Теснец.
Една од можностите што се разгледуваат се секундарни санкции против купувачите на иранска нафта, меѓу кои и Кина. Таков потег, сепак, би можел да предизвика одговор од Пекинг и дополнително да ја зголеми неизвесноста на светските енергетски пазари.
Според податоците на Џереми Панер од адвокатската канцеларија „Хјуз Хабард енд Рид“, САД од 2018 година вовеле околу 2.200 санкции против иранскиот нафтен и петрохемиски сектор.
Анализата на „Блумберг економикс“ оценува дека дополнителните мерки можеби нема да ја променат суштински позицијата на Техеран, имајќи предвид дека децениските санкции досега не го принудиле Иран да отстапи од своите клучни позиции.
Во меѓувреме, Иран ги реорганизира вооружените сили и зазема поагресивен став во странство, додека преговорите за завршување на конфликтот и натаму се во ќор-сокак.
Ормускиот Теснец останува една од главните точки на спорот. Пред војната, низ него минувала приближно една петтина од светската трговија со нафта и природен гас. Иран и Оман веќе подолго време преговараат за воспоставување поморски пат низ теснецот, но САД не се дел од тие разговори.
