Пратеничката на СДСМ и поранешна министерка за труд и социјална политика, Јована Тренчевска, остро ја критикуваше најавата за прослава на роденденот на ВМРО-ДПМНЕ на стадионот во Струмица.
Во објава на социјалните мрежи, таа праша дали прославата ќе се организира со пари на граѓаните и оцени дека власта има погрешни приоритети во период кога, според неа, граѓаните се соочуваат со економски проблеми.
„Колку забегавте! На стадионот во Струмица ВМРО-ОКГ ќе слави роденден! Со парите на народот?“, напиша Тренчевска.
Таа ја обвини Владата дека наместо да презема мерки за подобрување на животниот стандард, организира прослави.
„Ви треба прослава во време на криза и ниту една мерка за да подобрите животен стандард на граѓаните? Ви треба прослава, а доцните со исплата на социјалната помош?“, праша Тренчевска.
Во објавата таа посочи и дека државата продолжува да се задолжува.
„Ви треба прослава, а секој ден се задолжувате, односно го задолжувате народот?“, наведува пратеничката на СДСМ.
Тренчевска порачува дека, според неа, власта ќе ја задоволи сопствената суета, но дека конечната оценка ќе ја дадат граѓаните.
„Суетата ќе си ја задоволите, ама народот ќе ви пресуди“, порача Тренчевска.
