Пратеничката на СДСМ, Јована Тренчевска, на собраниската седница за реконструкција на Владата оцени дека промените во министерскиот состав не претставуваат нов почеток, туку признание за, како што рече, двегодишниот неуспех на Владата предводена од ВМРО-ДПМНЕ.
Тренчевска истакна дека реконструкцијата не ги решава клучните проблеми со кои се соочуваат граѓаните, оценувајќи дека со смената на неколку министри не може да се прикријат неисполнетите ветувања, падот на животниот стандард и слабите економски резултати.
„Ако Владата навистина беше успешна, тогаш зошто е потребна реконструкција? Ако министрите ги исполниле целите, зошто денес се менуваат? Ако не успеале, тогаш реконструкцијата е признание дека Владата не испорача резултати во изминатите две години“, изјави Тренчевска.
Таа потсети на предизборните ветувања за економски раст, намалување на инфлацијата, повисок животен стандард и подобра социјална заштита, оценувајќи дека реалноста е поинаква.
Според Тренчевска, граѓаните денес се соочуваат со повисоки цени, синдикална потрошувачка кошничка од речиси 70.000 денари, пад на странските инвестиции и индустриското производство, како и со нередовна исплата на дел од социјалните надоместоци.
Во своето обраќање таа посочи дека работниците, земјоделците, лицата со попреченост и другите ранливи категории, според неа, останале без ветената поддршка, а Владата не обезбедила ниту повисока минимална плата.
Тренчевска ја критикуваше и, како што рече, политиката на задолжување, оценувајќи дека државата се соочува со растечки буџетски дефицит и дека младите сè повеќе ја гледаат својата иднина надвор од Македонија.
На крајот од говорот порача дека реконструкцијата не носи суштински промени.
„Со оваа реконструкција не се менуваат политиките, не се поправаат грешките и не се презема одговорност. Се менуваат само фотелјите, додека истите луѓе продолжуваат да управуваат со државата. Македонија не може да оди напред со стара Влада во нова амбалажа“, рече Тренчевска.
