На денешната прес-конференција, потпретседателката на СДСМ, Јована Тренчевска побара политичка и кривична одговорност за случајот со масовното труење на граѓаните во Гостивар, оценувајќи дека институциите целосно потфрлиле во заштитата на јавното здравје.
Тренчевска изјави дека граѓаните имаат право да ја знаат целата вистина за причините за загадувањето на водата, начинот на кој се развивала состојбата и одговорноста на институциите.
Според Тренчевска, загадувањето на водата започнало на 25 јуни, а првите пациенти со симптоми биле регистрирани на 13 јули. Таа тврди дека бројот на заболени секојдневно се зголемувал, додека, како што рече, здравствените институции не презеле навремени мерки.
Од СДСМ посочија дека Институтот за јавно здравје ги издал првите детални препораки дури на 18 јули и обвинија дека само неколку дена пред официјалното откривање на загадувањето, Центарот за јавно здравје издал извештај според кој водата била безбедна за пиење.
Партијата критикуваше и што резултатите од анализите на водата не се јавно објавени, наведувајќи дека квалитетот на водата за пиење е прашање од јавен интерес и не смее да биде предмет на тајност.
Според Тренчевска, навременото предупредување и забраната за користење на водата немало да ја попречат истрагата, туку ќе придонеле за заштита на здравјето на граѓаните.
СДСМ побара оставки од министерот за здравство Сашо Клековски, директорката на Институтот за јавно здравје Марија Андоновска, директорот на Агенцијата за храна и ветеринарство Оливер Миланов, како и од одговорните лица во локалните центри за јавно здравје.
Од партијата порачаа дека мора да се утврди целосниот синџир на одговорност и дека здравјето на граѓаните мора да биде над сите институционални процедури.
