До 14:00 часот денеска во земјава се регистрирани вкупно осум пожари на отворен простор, од кои три сè уште се активни, еден е ставен под контрола, а четири се целосно изгаснати.
Според надлежните служби, активни се пожарите во дебарското село Гари, каде гори ниска вегетација и нискостеблеста мешана шума, во населбата Перо Чучо во Куманово, каде е зафатена депонија и ниска вегетација, како и на депонијата во Пехчево.
Под контрола е ставен пожарот кај селото Дворци во Општина Пласница, каде горела депонија.
Во меѓувреме, целосно се изгаснати четири пожари и тоа кај селото Казан Дол во Општина Валандово, во селото Инџиково во Општина Гази Баба, кај селото Руѓинце во Општина Старо Нагоричане и во близина на „Риал Компани“ во Општина Врапчиште, каде горела ниска вегетација.
Надлежните служби остануваат на терен и продолжуваат со активностите за локализирање и целосно гаснење на активните пожари.
