Три ер трактори гаснат кај Рамно, пожарите кај Белица и Селци-Локов под контрола

Сезоната на пожари на отворен простор сè уште не е завршена, а над 30 пожари биле регистрирани и во текот на вчерашниот ден, предупреди директорот на Дирекцијата за заштита и спасување (ДЗС), Стојанче Ангелов.

Тој информираше дека најавените врнежи во западниот дел на Македонија биле со помал интензитет и зафатиле само неколку подрачја. Дождот, сепак, помогнал при догасувањето на пожарот над Вруток.

— реклама —

Пожарот кај Коштионак е ставен под целосна контрола, откако во текот на вчерашниот ден врз него дејствувал полициски хеликоптер. Во моментов, според Ангелов, нема алармантни пожари, а сите активни пожари се под контрола. Сè уште има активен дел од пожарот кај Рамно, каде што денеска дејствуваат три ер трактори, со очекување пожарот целосно да биде изгаснат.

— реклама —

Пожарот во реонот на Белица, во правец кон ловиштето „Јасен“, исто така е под контрола и, според Ангелов, не претставува опасност за ловиштето. На терен се ангажирани вработени во ловиштето, со поддршка на огнени тимови и припадници на ДЗС. Пожарот се одвива ниско по земјата и не зафаќа борови дрвја.

Под контрола е ставен и пожарот што повеќе денови гореше во реонот на селата Селци и Локов, на границата меѓу општините Струга и Дебар. Останала уште една кратка активна линија, а гаснењето било отежнато поради големото количество натрупана сува вегетација, суви гранки и исечени дрвја што останале на земјата.

— реклама —

Ангелов посочи дека на овој пожар дејствувале и ер трактори и хеликоптер, но поради условите гаснењето било особено тешко. Преостанатиот активен дел, како што рече, не претставува опасност за населените места, ниту за квалитетна шума.

— реклама —

Тој предупреди дека состојбата може да се промени во текот на денот и повика граѓаните да бидат внимателни, бидејќи во попладневните часови може да избувнат нови пожари.

Според најавите од УХМР, за сабота и недела се очекуваат позначителни врнежи. Ангелов вели дека токму тие се очекуваат со надеж дека ќе стави крај на долгата сезона на пожари на отворен простор.