Додека илјадници граѓани на Гостивар се соочуваа со сериозна здравствена криза, небезбедна вода за пиење и последици по нивното здравје, премиерот Христијан Мицкоски отвораше базен во Кавадарци. Тоа е сликата за односот на Владата кон една од најсериозните здравствени кризи во државата, истакна организацискиот секретар на СДСМ, Зоран Трифуновски, во емисијата „Тема на денот“ на Сител.
„Труењето на граѓаните на Гостивар е недозволива катастрофа, каде што преку 4.000 луѓе веќе побараа хоспитализација во болницата во Гостивар. Скоро 22 дена граѓаните на Гостивар пиеја отровна вода, вода со фекалии, користеа техничка вода, од којашто добија сериозни здравствени проблеми по животот и здравјето. Ние секој ден апелиравме и се вклучивме максимално на терен, заедно со претседателот Филипче, кој исто така дојде во Гостивар, и побаравме итно прогласување епидемиолошка ситуација. За жал, од страна на власта имаше закаснета реакција, дури после пет дена се прогласи епидемија и институциите потфрлија на сите можни нивоа“, истакна Трифуновски.
Трифуновски обвини дека одговорноста не е само локална, туку сериозно потфрлиле и државните институции.
„Институтот за јавно здравје не преземал никакви мерки, Центарот за јавно здравје од Тетово, кој е надлежен за Општина Гостивар, не преземал никакви мерки, Агенцијата за храна и ветерина исто не се вклучила, а министерот за здравство Клековски никако не се појави пред граѓаните на Гостивар. Наместо да се појави и да ја објасни ситуацијата, Мицкоски отиде во Кавадарци, на базен, заедно со градоначалникот Митко Јанчев да го промовира отворањето на базенот“, рече Трифуновски.
Тој потсети дека ВМРО-ДПМНЕ е две години на централна и шест години на локална власт и дека повеќе не може да ја префрла одговорноста.
„Не се опозиција, не можат да се оправдуваат и да ги обвинуваат сите други. Власта треба да постапува во вакви ситуации, таму е одговонроста“, порача организацискиот секретар на СДСМ, Зоран Трифуновски.
