Големите патнички авиокомпании во март потрошиле повеќе од пет милијарди долари за авионско гориво, што е за 1,8 милијарди долари или 56 отсто повеќе во однос на февруари, соопшти американското Министерство за транспорт.
Цената по галон гориво достигнала 3,13 долари, што претставува раст од 31 отсто, додека потрошувачката на гориво се зголемила за 20 проценти.
Порастот на цените се поврзува со нарушувањата во транспортот низ Ормускиот теснец, кои ги вознемирија глобалните пазари на нафта и предизвикаа најголема криза во авиоиндустријата од пандемијата на КОВИД-19.
Во споредба со минатата година, кога авиокомпаниите за гориво во март платиле 3,88 милијарди долари, годинава трошоците достигнале 5,06 милијарди долари.
Како последица на растот на цените, голем број авиокомпании ги зголемија цените на билетите и дополнителните услуги, укинаа одредени линии и воведоа мерки за намалување на трошоците. Горивото учествува со до една четвртина од вкупните оперативни трошоци на компаниите.
Нискобуџетната компанија „Спирит ерлајнс“, која неодамна престана со работа, соопшти дека само во март и април платила дополнителни 100 милиони долари за гориво, наведувајќи го токму растот на цените како една од причините за неуспехот на планот за реструктуирање.
Иако дел од превозниците побараа државна помош, американските власти засега сметаат дека таква мерка не е неопходна.
