Турција подготвува нова воена стратегија, се разгледува и база во Саудиска Арабија

Турција подготвува нова одбранбена стратегија насочена кон справување со можни воени конфликти од големи размери и проширување на своето воено присуство во странство. Планот вклучува зајакнување на логистичката поддршка во Африка и Азија, обединување на воените структури во Либија и можност за отворање турска воена база во Саудиска Арабија, објави турскиот весник „Хуриет“.

Новата стратегија на Министерството за национална одбрана предвидува развој на линии за снабдување, логистички капацитети и договори со земјите домаќини, со цел турските вооружени сили да бидат подготвени за пошироките безбедносни предизвици.

— реклама —

Во Либија, каде што Анкара одржува воени врски и со источниот и со западниот дел од земјата, се разгледува можноста за формирање обединета армија со заедничка командна структура. На средбата на претставниците на двете страни во Анкара, одржана на 23 октомври, биле разгледани можните решенија.

Планот предвидува две фази: најпрво воено обединување, а потоа политичко помирување. Како една од можностите се споменува Абдул Хамид Дбеиба да остане премиер, додека Калифа Хафтар би ја презел функцијата началник на Генералштабот.

— реклама —

Друг важен дел од стратегијата е Спогодбата за заедничка одбрана од Мека, која предвидува соработка меѓу Турција, Саудиска Арабија и Пакистан во одбранбената индустрија, воената обука, заедничкото производство, размената на технологии и разузнавачките информации.

— реклама —

По назначувањето на пензионираниот пакистански генерал-потполковник Науман Махмуд за прв генерален секретар на 23 септември, започнало воспоставувањето на заедничко седиште во кое секоја од трите земји ќе има по пет воени и дипломатски претставници.

Саудиска Арабија ѝ понудила на Турција можност за воспоставување воена база на своја територија, според моделот на турското воено присуство во Катар. Целта би била зајакнување на одвраќањето, обука и советодавна поддршка за саудиските војници, како и развој на заедничките одбранбени капацитети.

За реализација на оваа можност потребно е завршување на парламентарната постапка во Турција и добивање на потребните овластувања за распоредување војници.

Според информациите, Вашингтон ја гледа регионалната одбранбена соработка како можен придонес кон рамнотежата и стабилноста на Блискиот Исток. Проценките во Анкара се дека САД во текот на 2027 и 2028 година би можеле да го намалат директното воено присуство во регионот и поголем дел од безбедносните одговорности да им препуштат на регионалните партнери.