Две лица загинаа, а 26 се повредени, од кои едно е во животна опасност, откако туристички автобус рано утрово се преврте на автопатот А96 во близина на Бухлое, во германската покраина Баварија.
Несреќата се случила нешто по 6 часот. Во автобусот со италијански регистарски таблички имало меѓу 40 и 50 патници, членови на туристичка група од Филипините. Нивната крајна дестинација засега не е позната.
Од полицијата соопштиле дека едно лице починало на местото на несреќата, додека второто им подлегнало на повредите кратко потоа.
Според првичните информации, автобусот од засега непознати причини излетал од десната страна на коловозот, без во несреќата да учествувало друго возило, по што се превртел во канал покрај автопатот. Предното ветробранско стакло било целосно уништено.
На местото на несреќата интервенирале голем број спасувачки екипи, а над подрачјето летал и хеликоптер. Пожарникарите го обезбедиле превртеното возило со јажиња и дрвени потпори.
Државното обвинителство ангажирало вештак кој треба да помогне во реконструкцијата на несреќата и утврдувањето на нејзината причина. Од полицијата нагласиле дека податоците за бројот и состојбата на повредените може да се менуваат во текот на истрагата.
Идентитетите на загинатите засега не се објавени.
Поради несреќата, автопатот А96, кој минува низ Бухлое и ги поврзува Минхен и Меминген, е целосно затворен во двата правци на делницата меѓу клучките Бухлое-Исток и Ландсберг на Лех-Запад.
Според информациите на германскиот авто-клуб АДАК, се очекува прекинот на сообраќајот да трае најмалку до 11 часот.
