Министерството за внатрешни работи соопшти дека е расчистено убиството на лекарот Ацо Трповски, кое се случи на 21 март 2024 година во скопската населба Автокоманда. Во акцијата се уапсени двајца сопружници од Скопје, осомничени за извршување и прикривање на кривичното дело.
Полициски службеници од СВР Скопје ги лишиле од слобода М.В. (65) и неговата сопруга С.В. (59), поради сомнение дека мажот го извршил убиството, а жената му помогнала да ги прикрие трагите.
Според МВР, по преземени мерки и активности, како и врз основа на повеќе наредби издадени од јавен обвинител, обезбедени се докази и е поднесена кривична пријава против М.В. за кривично дело „убиство“, а против С.В. за помагање при извршување на кривичното дело.
Истрагата покажала дека осомничената претходно договорила средба со Ацо Трповски на паркинг во Автокоманда и влегла во неговиот автомобил. Набргу потоа пристигнал нејзиниот сопруг, кој го извлекол Трповски од возилото и со нож му нанел девет убодни рани, од кои тој починал.
По убиството, сопружниците го ставиле телото во автомобилот, по што осомничениот го одвезол возилото до паркингот кај Поликлиниката „Железара“, каде телото било префрлено на возачкото седиште. Според полицијата, осомничената потоа ги избришала трагите од автомобилот, по што двајцата го напуштиле местото на настанот.
