„Вие бркате, затворате, тие ги пуштаат на слобода“, рече Мицкоски за укинување на пресудата за „Ласкарци“

Премиерот Христијан Мицкоски изрази разочарување од одлуката на Врховниот суд со која е укината пресудата за трагедијата кај Ласкарци, во која загинаа 16 лица. Тој порача дека Владата нема да се откаже од борбата за правда.

Мицкоски оцени дека одлуката претставува, како што рече, „последниот обид за заштита“ на поранешната власт на СДСМ и ДУИ и на луѓето кои биле дел од неа.

— реклама —

„Имаме триесетина жртви, имаме многу луѓе коишто имаат траен инвалидитет, но за жал тоа не е доволна причина за овие малкумина судии и обвинители да застанат на страната на правдата“, изјави Мицкоски.

— реклама —

Тој додаде дека ваквите одлуки, според него, ги засенуваат чесните судии и обвинители во правосудниот систем.

Мицкоски посочи дека за состојбите во македонското правосудство разговара и со колеги од Европската Унија, за, како што рече, да се види со какви предизвици се соочува земјата.

— реклама —

„Понекогаш имам и чувство дека со ветерници се бориме, како да е сето ова Донкихотовска битка. Вие бркате, затворате, тие ги пуштаат на слобода“, рече премиерот.

— реклама —

Според него, укинувањето на пресудата претставува големо разочарување, но тој порача дека тоа нема да биде причина за откажување од заложбите за правда.

„Тука не се откажуваме и нема да очајуваме. Ќе продолжиме да се бориме, правдата мора на крај да победи и ќе победи“, порача Мицкоски.