Управувал автомобил пијан и без дозвола, па предизвикал сообраќајка и избегал

Дваесет и деветгодишен жител на Дебар е лишен од слобода откако предизвикал сообраќајна незгода, избегал од местото на настанот и физички нападнал полициски службеници.

— реклама —

Од Министерството за внатрешни работи информираат дека на 29 мај околу 23 часот, на улицата „Зеќир Чанка“ во Дебар, бил приведен А.Л. (29) од Дебар.

— реклама —

Според полицијата, тој претходно на улицата „Амди Леши“, управувајќи патничко возило „Фолксваген Поло“ со дебарски регистарски ознаки, предизвикал сообраќајна незгода во која бил оштетен друг автомобил, по што го напуштил местото на настанот.

По преземени мерки, полициските службеници го сопреле возилото, при што, како што соопштува МВР, тој физички ги нападнал полицајците.

— реклама —

При контролата било утврдено дека возачот немал положено возачки испит, а алкотестирањето покажало 2,75 промили алкохол во крвта. Поради тоа, тој бил исклучен од сообраќај.

По наредба на јавен обвинител, возилото е одземено, а по целосно документирање на случајот против него ќе бидат поднесени соодветни пријави.