Левица преку соопштение соопшти дека на утрешната собраниска седница владејачкото мнозинство ќе побара поддршка за ребалансот на Буџетот за 2026 година, оценувајќи дека документот предвидува зголемено задолжување, додека нивните амандмани насочени кон јавниот интерес биле речиси целосно одбиени.
Според партијата, со ребалансот расходите се зголемуваат на 425,2 милијарди денари, а буџетскиот дефицит расте на 46,1 милијарда денари, односно 4,1 проценти од БДП. За покривање на дефицитот и отплата на обврските, како што наведуваат, се предвидени 76,4 милијарди денари ново финансирање.
„Тоа значи дека речиси секој десетти денар што ќе го потроши државата е позајмен. Над 54 милијарди денари од новото финансирање се обезбедуваат од странски кредитори, а само каматите ја чинат државата повеќе од еден милион евра дневно“, велат од Левица.
Од партијата тврдат дека Владата ги зголемува капиталните расходи и покрај, како што наведуваат, ниската реализација на капиталните инвестиции во првите месеци од годината.
„Не се решава проблемот со реализацијата на постојните проекти, туку на хартија се додаваат нови милијарди за нови ветувања“, се наведува во соопштението.
Левица посочува дека во ребалансот се предвидени две милијарди денари за, како што тврдат, „прикривање на неспособноста на градоначалниците од ВМРО-ДПМНЕ“, како и дополнителни 200 милиони денари за „изборна опрема“.
Партијата информира дека поднела амандмани за противпожарна заштита, планинско спасување, реконструкција на спортски објекти, поддршка на младите и спортистите, државно домување, земјоделски откупни центри, поддршка за жртви на насилство, изградба на канализациски и пречистителни системи, санација на депонии, заштита на културното наследство и развој на науката.
„Сите амандмани на Левица беа одбиени, освен еден кој беше делумно прифатен“, велат од партијата.
Според Левица, со предложениот ребаланс Владата го зголемува јавниот долг, а товарот од задолжувањето ќе падне врз граѓаните и идните генерации.
