УХМР предупредува: Врнежи над 30 литри и ветер до 70 километри на час

Под влијание на циклонска активност, земјава се соочува со нестабилно време проследено со врнежи, засилен ветер и пад на температурите, информираат од Управа за хидрометеоролошки работи.

— реклама —

Синоптичарите предупредуваат дека врнежите на повеќе места ќе бидат пообилни, со количини над 20 литри на квадратен метар, додека поради спуштање на ладна воздушна маса, на планините и повисоките подрачја дождот ќе преминува во снег. Паралелно, ќе дува засилен, повремено силен ветер кој на одредени места ќе достигнува брзина и над 70 километри на час.

Температурите ќе бидат значително пониски, при што минималните ќе се движат од 1 до 6 степени, а максималните од 7 до 12 степени.

— реклама —

Во Скопје се очекува претежно облачно време со врнежи од дожд и засилен до силен ветер од северен правец. Минималната температура ќе се спушти до 4 степени, додека максималната ќе достигне до 10 степени.

— реклама —

Нестабилното време ќе продолжи и во наредните денови. Утре и во четврток се очекуваат нови врнежи, кои локално ќе бидат уште пообилни, над 20 литри на квадратен метар утре, а над 30 литри во четврток. И во овој период, на повисоките места дождот ќе преминува во снег поради студената воздушна маса.

Во петок и сабота времето ќе биде променливо облачно со услови за слаб локален дожд, додека засилен ветер ќе има утре и во сабота, со удари над 70 километри на час.

Од недела се очекува стабилизација на временските услови, со претежно стабилно и потопло време.