Вашингтон и Техеран повторно на преговарачка маса: Запрени воените активности

По неколкудневните судири во Персискиот Залив, САД и Иран постигнале договор за прекин на непријателствата и продолжување на разговорите во рамките на претходно потпишаниот меморандум за разбирање, потврдил американски функционер за повеќе светски медиуми.

Според информациите, двете страни се согласиле да ги продолжат техничките разговори за сите точки од договорот, а во меѓувреме да се воздржат од понатамошни воени дејства.

— реклама —

„Тие се согласија да продолжат со техничките разговори во однос на сите делови од меморандумот за разбирање. Двете страни засега ќе се повлечат и бродовите ќе можат слободно да се движат“, изјавил американски функционер.

Веста за постигнатата согласност дополнително ги зголеми надежите дека привремениот мировен договор меѓу Вашингтон и Техеран би можел да опстои и покрај вооружените инциденти во изминатите денови.

— реклама —

Американскиот портал „Аксиос“, повикувајќи се на висок претставник на администрацијата, објави дека нова рунда разговори меѓу претставници на Вашингтон и Техеран треба да се одржи утре во Доха, главниот град на Катар.

„Одлучивме да ги запреме сите кинетички активности“, изјавил неименуваниот американски функционер, користејќи термин што најчесто се однесува на прекин на воените операции.

Во меѓувреме, германската новинска агенција ДПА, исто така, повикувајќи се на извори од американската администрација, објави дека САД очекуваат разговорите да продолжат и во наредните денови.

— реклама —

Засега нема официјална реакција од Техеран во врска со наводите на американските претставници.

Инаку, претставниците на двете земји првично требаше да ги продолжат мировните преговори вчера, но Иран го откажа учеството, обвинувајќи го Вашингтон за нарушување на договореното 60-дневно примирје.

Во последните денови, САД извршија напади врз ирански цели како одговор на нападите врз комерцијални бродови во Ормускиот Теснец, за кои Вашингтон го обвини Техеран. Иран возврати со напади со беспилотни летала врз локации во Заливот каде што се распоредени американски сили, по што следуваше нова ескалација на тензиите.

Дополнителна неизвесност во регионот предизвикаа и новите напади на Израел врз позиции на Хезболах во јужен Либан и покрај неодамна постигнатиот договор за прекин на огнот.