Вештачење: Реконструкцијата во „Пулс“ била нелегална, објектот не можел да биде кабаре

Градежната реконструкција во дискотеката „Пулс“ во Кочани била изведена без проектна документација, стручен надзор и потребните одобренија, покажало вештачењето презентирано на денешното судење за пожарот во објектот.

Вештото лице Маријана Лазаревска на рочиштето посочила дека изведените зафати не можат да се сметаат за надградба, доградба или адаптација, туку претставуваат реконструкција за која требало да биде спроведена целосна законска постапка.

Според неа, пренамената на објектот од магацин во угостителски објект значително го зголемила товарот врз конструкцијата и влијаела врз безбедноста. Во објектот биле поставени челични столбови и греди, надворешни скали и настрешница, а низ годините биле правени и други измени.

— реклама —

Лазаревска навела дека во 2012 година постоеле челични галерии со пристап преку скали, кои биле отстранети во 2024 година. На задниот ѕид била оформена бина, додека внатрешните столбови биле маскирани со гипс-картон. Поткровјето било изведено со стаклена волна, гипс-плочи и полиуретански сунѓер, материјал кој целосно изгорел во пожарот.

Како единствен документ кој наликувал на проект, вештото лице го посочило документот изработен од „ВЕНЦИ“ ДООЕЛ Кочани, кој се однесувал на промена на намената на објектот во угостителски објект – кабаре. Според Лазаревска, документот не ги содржел законски предвидените фази, не бил доставен во Општината, а предвидените мерки не биле реализирани.

— реклама —

Таа истакнала и дека во документацијата никаде не го сретнала терминот „полиуретански сунѓер“.

Според геодетскиот елаборат од 16 март 2025 година, габаритот на објектот не се менувал низ годините, а неговата површина континуирано изнесувала околу 472 квадратни метри.

„Ова значи дека објектот никогаш немал површина помала од 300 квадратни метри, а таа бројка е исклучително важна за определување на категоријата на угостителскиот објект“, рекла Лазаревска.

— реклама —

Според неа, објект со таква површина не можел да се третира како кабаре, бидејќи не го исполнувал условот за таа категорија. Таа додала дека начинот на користење на просторот, организацијата, просторијата за гости и опремата укажуваат дека објектот по своите карактеристики припаѓал во категоријата диско-клуб, а не кабаре.

На паузата од судењето, Александар Наунов, кој се обрати во име на семејствата на загинатите, изјави дека градежното вештачење и исказите на стручните лица ги откриваат долгогодишните пропусти и непостапувања.

— реклама —

„Не бараме ништо повеќе од вистината, но нема да прифатиме ништо помалку од неа. Фактите зборуваат, а одговорноста мора да добие име и презиме“, рече Наунов.

Судењето го води судијката Дијана Груевска-Илиевска, а обвинението го застапува тим од 15 јавни обвинители.

Во пожарот во дискотеката „Пулс“ во Кочани, кој избувна на 16 март 2025 година, за време на настапот на групата ДНК, загинаа 63 лица, а повеќе од 200 беа повредени.