Вештак го исклучи Ѓоко Ристов од можноста да ги пишувал ливчињата пронајдени со парите

Обвинетиот Ѓоко Ристов со сигурност е исклучен како автор на ракописите што биле предмет на графолошко вештачење, изјави вештото лице Емилио Фришчиќ, специјалист за испитување спорни документи, при сведочењето пред судот.

Фришчиќ објасни дека анализирал пет документи, меѓу кои и три хартиени ливчиња со рачно испишани цифри, кои, според доставените материјали од Обвинителството и дигиталните докази, биле пронајдени во полиетиленски кесички, во три одделни снопа пари.

— реклама —

Според вештакот, спорните ракописи и цифри не се идентични со ракописот на обвинетиот, односно не биле напишани со неговата рака.

„Согласно мислењето на кое останувам, Ѓоко Ристов е елиминиран со сигурност како можен скриптер“, посочи Фришчиќ, објаснувајќи дека категоријата „сигурност“ е највисок степен на заклучок во неговото вештачење, над степенот на веројатност.

— реклама —

На прашањето кој ги напишал спорните текстови, вештакот ја посочи мајката на обвинетиот, Донка Ристова.

„Останувам на тоа мислење дека таа е таа која ги има напишано“, рече Фришчиќ.

— реклама —

Во текот на испитувањето било отворено и прашањето дали при пишување на хартија остануваат биолошки траги што би можеле да бидат предмет на ДНК-анализа.

Вештакот објасни дека при допир на кожата со хартијата постои голема веројатност да останат епителни клетки, кои подоцна можат да се анализираат. Сепак, нагласи дека тоа не се случува во секоја ситуација и дека, доколку лицето немало допир со хартијата, не би оставило такви траги преку допир.

Во однос на потеклото на документите, Фришчиќ појасни дека трите ливчиња биле дел од три снопа банкноти, но дека тој лично не присуствувал на местото каде што биле пронајдени.

Неговите сознанија за местото и начинот на пронаоѓање на парите се темелат на материјалите што му биле доставени за вештачење, според кои парите биле пронајдени при претрес.