(Видео) Ангелов: Чаниште е безбедно, пожарот се движи кон Крушевица

Директорот на Дирекцијата за заштита и спасување (ДЗС), Стојанче Ангелов, информира дека селото Чаниште е безбедно и во моментов нема опасност пожарот да го загрози населеното место. Огнената линија се движи во правец кон Мариово, односно кон Крушевица, а екипите на терен продолжуваат со борбата за нејзино ставање под контрола.

Ангелов посочи дека линијата е многу долга, но изрази оптимизам дека пожарот ќе биде изгаснат во текот на денот. Во гаснењето се ангажирани четири возила „пинцгауер“ на ДЗС, огнените тимови на Дирекцијата и пожарникарите од Прилеп.

— реклама —

Тој информираше и дека трите манастири во близина на пожарот се обезбедени и дека во нивниот реон се преземаат мерки со контролирано палење и создавање заштитни пресеци. Според Ангелов, во моментов нема опасност за ниту еден од манастирите.

Во раните утрински часови се очекува ангажирање и на полициски хеликоптер, а на терен ќе биде поставен и монтажен базен со вода од кој леталото ќе може да се снабдува. Сепак, поради конфигурацијата на теренот и појавата на силен ветер, употребата на хеликоптерот на одредени места е отежната.

— реклама —

„Важно е да немаме опасност по ниту едно село. Сите пожарникари и сите лица што учествуваат во гаснењето се живи и здрави“, истакна Ангелов.

Тој информираше дека во текот на вчерашниот ден едно лице, кое работело со багер, се повредило во ногата.

— реклама —

Освен пожарот кај Чаниште, активни се и пожарите на територијата на Студеничани, високо во планината, како и на подрачјето на Македонски Брод. Ангелов посочи дека пожарот кај Студеничани зафаќа поголема површина, додека пожарот кај Македонски Брод е во голема мера намален.

Сепак, тој предупреди дека променливиот ветер претставува сериозен проблем за пожарникарите на терен, бидејќи ситуацијата може да се промени за само неколку секунди.

„Ова е најголемиот пожар ова лето. Иако има ретки грмушки и поретка, неквалитетна шума, сепак тоа е вегетација и се бориме да ја спасиме“, порача Ангелов, апелирајќи до граѓаните да бидат крајно внимателни, бидејќи една искра може да предизвика катастрофа.