Опасноста од пожари на отворен простор и натаму е висока, а само во текот на вчерашниот ден биле регистрирани најмалку 26 пожари, информира директорот на Дирекцијата за заштита и спасување, Стојанче Ангелов.
Тој посочи дека големиот број пожари претставува сериозен товар за пожарникарите и сите екипи кои секојдневно учествуваат во нивното гасење.
Драматична била ситуацијата во Општина Боговиње, каде што пожарот во реонот меѓу селата Урвич и Ловјане се приближил до селото Јеловјане. Огнот се спуштал низ сува трева и папрат од околу 1.400 метри надморска височина, но пожарникарите успеале да го сопрат пред да стигне до селото. Во гасењето помогнале и жители од загрозените села.
Во моментов состојбата таму е стабилна, пожарот е ставен под контрола и не претставува опасност за населените места. Не била зафатена ниту квалитетна шума.
Потежок пожар има и во Струшко, во реонот на селата Локов и Буринец. Станува збор за шумски пожар кој засега претежно зафаќа грмушки и ниска вегетација, но постои опасност да се прошири кон поквалитетна шума. На терен се екипи на „Национални шуми“, а се разгледува и можноста за ангажирање хеликоптер.
Пожар избил и во Штипско, во близина на селото Селце и вештачкото езеро Мантово, на падините на планината Серта. Штипските пожарникари, со поддршка на тим на Дирекцијата за заштита и спасување и доброволни пожарникари, работат на негово ставање под контрола. Во акцијата е вклучен и полициски хеликоптер, кој помогнал во локализирањето на еден крак од пожарот.
Ангелов очекува пожарот во Штипско да биде целосно ставен под контрола во текот на денот.
Тој повторно апелираше до граѓаните да бидат крајно внимателни, нагласувајќи дека и покрај почетокот на учебната година, опасноста од пожари не е намалена.
„Вегетацијата е многу сува и доволна е само една искра за вистинска катастрофа“, предупреди Ангелов.
