Силното невреме што го зафати Скопје предизвика сериозни проблеми на повеќе локации низ градот. Под подвозникот кон Бутел, поради големата количина вода што се собра на коловозот, автомобил остана заглавен и не можеше да го продолжи движењето.
Во меѓувреме, и други граѓани споделуваат информации за последиците од невремето на различни делови од главниот град. Според нивните пријави, паднати дрвја и делови од фасади има во Центар, Дебар Маало, Ченто, Капиштец, Лептокарија и Карпош 4, при што оштетени се и неколку паркирани возила.
Граѓаните информираат и дека не работат семафорите кај булеварот „Борис Трајковски“, како и на крстосницата кај „Раде Кончар“, што дополнително го отежнува одвивањето на сообраќајот.
Особено тешка е состојбата и на потегот од Континентал кон Бит Пазар, каде што има големи количества вода на коловозот. Според пријавите, кај пешачкиот мост во близина на Бит Пазар водата се прелева преку коловозот и ги заплискува возилата што се движат во правец кон Центар.
Граѓаните апелираат до возачите да бидат особено внимателни, да избегнуваат движење низ поплавените подвозници и да ја приспособат брзината на условите на патот, додека надлежните служби работат на расчистување на последиците од невремето.
