(Видео) Дрон од Украина влегол во романскиот воздушен простор и се урнал во шума

Беспилотно летало се урна во близина на селото Солка, во округот Сучава, на северот од Романија, откако четири минути се движело во романскиот воздушен простор. Нема повредени или материјална штета, соопшти романското Министерство за национална одбрана.

Вршителот на должноста министер за одбрана, Раду Мируца, изјави дека леталото влегло во романскиот воздушен простор од правец на Украина и се урнало во шумска област каде што не постоела опасност за населението.

— реклама —

Според првичните информации, станува збор за дрон со нешто понови технички карактеристики во споредба со леталата што романското Министерство ги регистрирало досега.

Мируца изјави дека ноќта била интензивна за романската армија, при што осум борбени авиони биле кренати во воздух од полноќ до утрото.

— реклама —

Дронот не бил соборен бидејќи, според министерот, не биле исполнети истовремено сите потребни услови за таква постапка. Леталото во романскиот воздушен простор се задржало околу четири минути пред да се урне.

— реклама —

„Очигледно е дека е потребен протест против оние кои не го почитуваат меѓународното право, како што е Руската Федерација“, изјави Мируца, додавајќи дека Романија не е во војна и дека нејзината армија дејствува според плановите предвидени за мирновременски услови.

Тој нагласи дека дипломатската реакција не е во надлежност на Министерството за одбрана, туку дека информациите за инцидентот се доставуваат до Министерството за внатрешни работи, Министерството за надворешни работи и Претседателската администрација.

Според Мируца, бројот на дронови што годинава навлегле во романскиот воздушен простор е трипати поголем во споредба со 2025 година. Тој зголемувањето го поврза со интензивирањето на воените активности на украинскиот фронт.

Романските власти сега го очекуваат извештајот од екипите кои се на местото на падот, по што ќе се утврдуваат дополнителни детали за леталото и околностите на инцидентот.