Снимка од паркингот кај Зелено пазарче во Скопје открива злоупотреба на системот за наплата, при што повеќе возила излегуваат со една платена картица, оставајќи ги оние што плаќаат – без место за паркирање.
Револтиран жител кој го снимил случајот вели дека проблемот е сериозен и секојдневен, а последиците директно ги чувствуваат граѓаните кои редовно плаќаат.
„Три коли имаме, не една, три. Три коли на една картица. И потоа што работиме ние тука, живееме, си плаќаме паркинг, немаме паркинг“, вели тој.
Според објаснувањето, дел од возачите воопшто не земаат влезна картица, па системот не ги евидентира дека се внатре. При излез, возилата се движат блиску едно до друго – за да ја измамат рампата и да излезат со една платена карта.
Од ЈП Паркинзи на Општина Центар (ПОЦ) остро реагираат и велат дека станува збор за сериозна злоупотреба.
„Станува збор за злоупотреба на системот за наплата и контролирано излегување од паркиралиште, при што со еден билет се обидуваат да излезат повеќе возила, едно по друго, со што директно се нарушува редот, се оштетува системот и се доведува во прашање безбедното функционирање на паркиралиштето“, соопштија од ПОЦ.
Оттаму додаваат дека случајот е веќе евидентиран и ќе биде пријавен до Министерството за внатрешни работи. Доколку се утврди штета, таа ќе им биде фактурирана на сторителите согласно закон.
„ЈП ПОЦ нема да толерира злоупотреба на системите за контрола и наплата, ниту оштетување на опремата и јавниот имот“, велат од претпријатието.
Во обид да се спречат ваквите злоупотреби, од ПОЦ најавуваат инвестиции во нова технологија – поставување дополнителни индуктивни јамки, двојни рампи и системи за читање на регистарски таблички.
Целта, како што велат, е да се обезбеди фер и безбедно користење на паркинзите, без можност за манипулации кои директно ги оштетуваат граѓаните.
