Аналитичарот за говор на телото Дарен Стентон, познат и како „човечки детектор на лаги“, го анализираше однесувањето на американскиот претседател Доналд Трамп за време на церемонијата на доделување на медалите по финалето на Светското првенство, оценувајќи дека неговата средба со Лионел Меси била „многу непријатна“.
По победата на Шпанија над Аргентина со 1:0 во финалето, Трамп неочекувано му се придружи на претседателот на ФИФА, Џани Инфантино, на победничкиот подиум и лично им ги врачуваше медалите на фудбалерите.
Според Стентон, Меси делуваше како да не сака да се задржува покрај Трамп и избегнуваше каква било подолга комуникација со него.
„Кај Лионел Меси се гледа дека воопшто не сака да остане. Мислам дека Трамп се обидува да воспостави контакт додека му го става медалот, но Меси веднаш се врти и си заминува. Делуваше многу воздржано во комуникацијата со Трамп“, изјави Стентон.
Тој додаде дека, според неговата проценка, односот на аргентинскиот капитен кон американскиот претседател бил прилично ладен, а оцени и дека Трамп веројатно очекувал поинаква реакција.
„Мислам дека Трамп тргнува од ставот: ‘Јас сум претседател, сите ќе бидат воодушевени’. Но, луѓето очигледно не се толку импресионирани“, рече аналитичарот.
На социјалните мрежи се појавија различни толкувања на снимката. Дел од корисниците сметаат дека Меси намерно избегнал контакт со очите со Трамп, додека други тврдат дека снимките покажуваат дека сепак накратко се погледнале и дека анализата е претерана.
