Претседателот на СДСМ, Венко Филипче, оцени дека зголемувањето на пензиите од околу 3 отсто не е доволно за пензионерите да ги покријат зголемените трошоци и да имаат достоинствен живот.
По средбата со пензионери во скопската општина Карпош, Филипче посочи дека растот на цените и трошоците за живот дополнително го оптоварува стандардот на пензионерите, за кои, како што рече, се потребни дополнителни мерки за поддршка.
„Пензионерите никако не може да го почувствуваат зголемувањето, имајќи предвид дека зголемување од под 3%, не е доволно да се преживее месецот на толкав голем раст на сите цени, на толкав голем раст на горивата. На ваков удар на стандардот кој што се случува изминатите месеци, на пензионерите навистина има потребна поголема поддршка“, рече Филипче.
Тој додаде дека на средбите со пензионерите се разговарало и за пошироките состојби во државата и политиките кои, според него, влијаат врз животниот стандард.
Филипче рече дека пензионерите се загрижени за економската состојба, задолженоста на државата, европскиот пат, како и за условите во кои живеат нивните деца.
„Меѓутоа и како наша најстара категорија на граѓани, тие се загрижени и за многу други работи, загрижени се за севкупните случувања во земјата, загрижени се за тоа што е загрозен европски пат, загрижени се за тоа што земјава е презадолжена, загрижени се за сите други лоши политики во однос на стандардот, економијата, финансите“, рече Филипче.
Тој додаде дека, според него, голем број пензионери се загрижени и поради тоа што нивните деца бараат можности за подобар живот надвор од државата.
