Лидерот на СДСМ, Венко Филипче, со навреди го нападна премиерот Христијан Мицкоски од собраниската говорница. Во еден момент од говорот, коментирајќи ги ставовите на премиерот за Исланд и Европската Унија, Филипче го нарече Мицкоски „идиот“, па праша дали е „комплетен идиот“.
Филипче, изнервиран, реагираше на изјавите на Мицкоски поврзани со Исланд и неговиот однос кон членството во Европската Унија.
„Па сега некои будалаштини збори дека Исланд не сакал во Европската Унија. Па Исланд е дел од заедничкиот пазар. Па може ли таков идиот да е човекот, комплетен? Да нè изолира целосно? Па дали мисли дека сме наивни“, рече Филипче од собраниската говорница.
Нападот кон Мицкоски беше дел од поширокото обраќање на Филипче за европската перспектива на Македонија. Тој оцени дека земјата се наоѓа во „политички ќорсокак“ и за таквата состојба директно го обвини премиерот.
„Не знам дали сте свесни каква политичка тежина има овој политички момент, кога по 30 и кусур години ние сме во политички ќорсокак по желба на Христијан Мицкоски? Има јасен патоказ за четири земји, нас таму нè нема. Притоа Христијан Мицкоски сè уште глуми патриот. Ќе го бранеше името, јазикот, културата, идентитетот, а сè е зачувано во меѓународните договори“, рече Филипче.
Тој продолжи со предупредувања за последиците кои, според него, би ги имала земјата доколку остане надвор од европските интегративни процеси. Филипче зборуваше за „децении сиромаштија и изолација“, продолжено иселување и, како што рече, „распродадена земја“.
На крајот му порача на Мицкоски дека „вечерва ако треба да не спие“ за да види што ќе и каже на Фон дер Лајен која доаѓа утре во Скопје.
