(Видео) „Глупава си, имаш низок коефициент на интелигенција“: Трамп нападна новинарка

Американскиот претседател Доналд Трамп влезе во жестока вербална расправија со новинарката на Си-ен-ен, Кејтлан Колинс, пред Белата куќа, откако таа го праша дали укинувањето на американските санкции кон Русија било дел од договорот за ослободување на американски државјанин. Наместо директен одговор, Трамп ја нарече новинарката „глупава“ и „личност со низок коефициент на интелигенција“.

Инцидентот се случил во средата, кога Колинс побарала објаснување дали одлуката за укинување на санкциите била поврзана со ослободувањето на Стивен Хабард, американски професор кој бил во руски притвор од 2022 година.

Трамп првично тврдел дека Вашингтон не направил никакви отстапки кон Москва, но потоа изјавил дека без одлуката за санкциите Хабард немало да биде ослободен. Новинарката побарала да објасни дали тоа значи дека американската администрација сепак дала нешто за возврат.

— реклама —

„Немаш поим за што зборуваш. Ти си глупава. Ти си личност со низок коефициент на интелигенција. Глупава си и работиш за Си-ен-ен“, ѝ одговорил Трамп.

Тој продолжил да го брани начинот на кој биле водени преговорите со Русија, нагласувајќи дека ослободувањето на американскиот државјанин е негова заслуга.

„Ако преговарам за да вратиме човек кого со години се обидуваме да го вратиме, човек кој бил затвореник во Сибир или на друго место во Русија, тогаш го враќаме благодарение на мене“, изјавил американскиот претседател.

— реклама —

Колинс повторно го поставила прашањето за поврзаноста меѓу санкциите и ослободувањето, посочувајќи ја разликата меѓу неговите тврдења дека немало отстапки и дека одлуката за санкциите помогнала во преговорите.

„Вклучи го мозокот“, ѝ порачал Трамп, одбивајќи дополнително да ја разјасни противречноста во своите изјави.

Ова е втор јавен судир на американскиот претседател со новинари во период од два дена. Претходно, за време на прес-конференција во Овалната соба, Трамп влегол во расправија и со новинарот на „Индипендент“, Ендрју Фајнберг.

Расправа започнала откако Фајнберг поставил прашање за новата програма за пријавување измами во федералната администрација, со која се предвидува награда од еден процент од повратените средства, додека постојното законодавство за одредени случаи предвидува најмалку десет проценти.

— реклама —

Потпретседателот Џеј Ди Венс го оценил прашањето како „исклучително нечесно“, објаснувајќи дека новата програма би опфатила многу поширок круг измами од оние што ги покрива постојниот закон.

Подоцна, кога Фајнберг започнал да поставува друго прашање поврзано со голф-терените на Трамп, претседателот го прекинал и му наредил да замолчи.

„Што не е во ред со тебе? Дали си болен?“, го прашал Трамп.

„Колку што знам, не сум, господине“, одговорил новинарот.

„Мислам дека нешто не е во ред со тебе“, возвратил американскиот претседател.

Трамп претходно му порачал на Фајнберг и да „биде внимателен“, а новинарот не успеал да го доврши прашањето за голф-терените.