(Видео) „Го подавале како топка, го држеле до дрво додека го удирале со боксирач“ - потресно сведоштво на мајката чие дете е натепано во Влае

„Ако пријавиш, мамо, повторно ќе се случи истото.“ Со овие зборови 13-годишното момче од Ѓорче Петров, кое беше претепано од група малолетници во скопската населба Влае, ја молело својата мајка да не оди во полиција. Таа пред камерата на „Скопје1“ раскажа дека детето и се вратило дома со скршени заби, модринки, отоци и повреди на главата.

Во потресно сведоштво за „Скопје1“, мајката раскажува што се случувало ноќта на 18 октомври на плоштадот „Делфина“, каде што нејзиниот син бил нападнат од група постари малолетници. Според нејзините сознанија, станува збор за околу 15 до 20 деца, претежно на возраст од околу 16 години.

„Едно од децата му пристапило со зборовите: ‘Е, овој може’. Го турнало во еден круг, му удрило шлаканица, а кога син ми се обидел да се тргне, налетале останатите. Почнале да си го подаваат како да е топка, да го фрлаат од еден крај на друг“, раскажува мајката.

Според неа, нападот продолжил со боксови и клоци, а бил употребен и метален боксирач.

„Едно од децата го држело за јакната и почнало да го удира со боксови. Потоа пристапиле и останатите. Најстрашно е што бил употребен боксирач. Ударите биле претежно во главата. Има силна контузија, отоци, модринки и крвни подливи“, вели таа.

— реклама —

Детето останало и без делови од два заба, за кои мајката претпоставува дека биле скршени од удар со боксирач.

Во еден момент, раскажува таа, напаѓачите го притиснале до дрво. Дел го држеле, додека други продолжиле да го удираат. Неговите другари, исто така деца на возраст од околу 13 години, не можеле да се спротивстават на бројната група. Еден од нив се обидел да му помогне да стане, но и тој бил турнат.

Мајката вели дека првото сомневање дека нешто страшно се случило го добила кога синот престанал да ѝ одговара на телефонските повици.

„Не се случило да не ми крене телефон. Кога се качи дома, не сакаше да ја соблече јакната, а качулката му беше на главата. Кога ја тргна, видов дека крвави, дека е модар околу окото и дека има страшен оток“, сведочи таа.

— реклама —

Првично, момчето се обидело да го сокрие нападот. Ѝ кажало дека во автобус имало турканица, дека паднало и така се повредило. Но мајката не поверувала и контактирала со еден од неговите другари, од кого дознала дека се случило нешто многу посериозно.

„Првично ме молеше да не пријавам, за да не настане поголем проблем. Ми рече: ‘Ако пријавиш, мамо, повторно ќе се случи истото’. Но не можам да дозволам детето да ми живее во страв. Апсолутно не можам“, вели мајката.

Таа тврди дека не постоела конкретна причина за нападот. Според она што ѝ го раскажал синот, еден од напаѓачите го познавал од порано, а како помали се дружеле неколку години. Само ден претходно се сретнале на улица и нормално се поздравиле.

Особено вознемирувачко е нејзиното сведоштво за информациите што кружат за група малолетници, која не може да се тврди дека е истата. Според тие непотврдени информации, на плоштадот „Делфина“ наводно се формирал круг во кој се тепал оној што ќе поминел низ него.

„Кружи таа варијанта дека на самиот плоштад ‘Делфина’ се формира некој круг и кој случајно ќе помине во тој круг, добива ќотек“, раскажува мајката, додавајќи дека ова сознание го пренела и во полицијата.

— реклама —

Таа се надева дека безбедносните камери во околината ќе помогнат да се утврди што точно се случувало и кои биле сите учесници.

Мајката открива и дека имала непријатна комуникација со мајката на едно од децата, која, според нејзиното сведоштво, реагирала со повишен тон и не очекувала случајот да биде пријавен во полиција.

Но физичките повреди, вели, не се единствениот проблем. Семејството сега стравува за психолошките последици од нападот и планира да побара стручна помош.

„Стравот е голем, не само кај него, туку и кај нас како родители. Сега постојано се плашам дека и ако го пуштам до продавница, нешто ќе му се случи. Ќе посетиме психолог, затоа што ова е тешка траума и мислам дека нема да се справиме без психолошка помош“, вели таа.

На крајот, мајката упати порака до сите родители да обрнат внимание каде се нивните деца, со кого се дружат и што носат со себе.

„Треба да се запрашаме каде ни се децата, што носат со себе и дали се свесни што можат да направат. Секој треба да ги сноси последиците од своите постапки. И моето дете да направело такво нешто, би требало да одговара“, порача таа.

Од МВР претходно за „Скопје1“ потврдија дека на 18 октомври во 15:30 часот 39-годишна жена пријавила физички напад врз нејзиниот малолетен син од група малолетници, при што бил употребен тврд предмет. Полицијата информираше дека презема мерки за расчистување на случајот.

Тврдењата за употреба на метален боксирач, точниот број напаѓачи и наводниот круг за тепање се дел од сведоштвото на мајката и засега не се независно потврдени од полицијата.

Засега, се немаат огласено ниту пријавените деца, ниту пријавените родители.