Пожарите во западниот дел на Атика влегоа во петтиот ден, а стотици пожарникари и натаму се борат со три активни огнени фронта, јавуваат грчките медиуми.
Најголемите напори се насочени кон подрачјето меѓу Псата и Лумпа, каде што пожарот и понатаму претставува најголема закана. Според противпожарните служби, најкритичен период во текот на денот е по 13:30 часот, кога високите температури и ниската влажност на воздухот создаваат услови за повторно разгорување на огнот.
Заменик-портпаролот на грчката противпожарна служба, Јанис Артопојос, соопшти дека активни се три главни пожарни фронта – на североисток, во подрачјата Крио Пигади, Агија Параскеви и Агиос Нектариос, потоа меѓу Псата и Лумпа, како и на југоисток, во областите Кандили и Агија Скепи.
Во гаснењето се ангажирани околу 450 пожарникари со 126 возила, 22 пешадиски противпожарни екипи, доброволци, цистерни со вода, како и авиони и хеликоптери. Помош пристигна и од Франција и Романија, кои испратија 46 пожарникари и осум противпожарни возила.
Според досегашните проценки, пожарите зафатиле околу 132.900 хектари во Атика и Беотија, при што е предизвикана голема штета на домови, земјоделски површини, посеви и друга инфраструктура.
Професорот по инженерство за заштита на животната средина на Универзитетот „Аристотел“ во Солун, Демостен Саригијанис, предупреди дека последиците од пожарите нема да завршат со нивното гаснење.
Тој истакна дека пожарите сериозно ги загрозуваат екосистемите и биолошката разновидност, а дополнително предупреди и на сериозното загадување на воздухот. Според неговите податоци, концентрацијата на честичките PM2,5 достигнала 190 микрограми на кубен метар, што е речиси 20 пати над препорачаната безбедна граница од 10 микрограми.
Саригијанис посочи дека согорувањето на вегетацијата, но и на куќи, изолациски материјали, гуми, електронски уреди и фотоволтаични системи, ослободува опасни материи како диоксини, јаглеводороди и тешки метали, што претставува дополнителен ризик за здравјето на населението.
